Ebblwoi im Lager.

Heddas gemergd? ‘S geid lous. De Wahlkrompf. Uffbasse sach isch blous, ufbasse. Erschda daald de Koch, kennda net? No is ned sou schlimm, wie ma moand, dä is blous Minischderbräsidend vun Hessen un CDU-Voasitzenda do. Also eschda daalda die Welt oi in die CDU un vielleischd noch die FDP, wonn se schee brav is, un die Oannan. Die Linge. Also die EssbeeDee und die PDS, ähm die Lingsrumpadei mitsomd de Griene in oa Schachdl, dass ma sischs bessa merge konn, wä die bolidische Gegna sin, mä wäd hald ald, gell. Ob die aa Soze sache, wie de Bimbes-Kohl sellemols imma?
E-gal, uf jedenfall hoda uns jedzad oigedaald un uns all in Lager vapaggd, – dengda -. Des mit de roure Sogge glaabd doch koa Mensch mehh, außer de Leid, wu souwiesou CDU wähle, egal warum, haubdsach do schdeid e C vonnedroa, warum aa imma des dod schdeid.

Uff jeden Fall hodda des schoinbaa gemergd un schee oam Wocheend, wonn die Oannan all dehoam mit de Kinna orra Englscha schbiele was mim Ebblwoi ‘rum geblädd. Ählisch, im Oafng heww isch aa gedengd, dunnawerra, de Koch, do gugge mol hi, heed isch’em gaa ned zugedraud, awwa donn hewwisch des gelese un m ä is e Lischd uffgonge. Zeitung: «Apfelwein»-Verbot war faktisch schon im Juli vom Tisch Wahlkrompf, nix als Wahlkrompf. Seidm Juli, iwwalegeischemol seidm Juli waa des Thema schunn gesse. Gesse waas, Vahondlungsmasse, dass de Seehoufer was oanneres zugewwe muss. Do hewwischs gemergd! De Wahlkrompf vum Koch un soine C-Demokraade hod oagfange.

Uffbasse sach isch Eisch ufbasse! Erschde emol blous die Helfd glaawe un ned blous die Iwwaschrifde leese, bissl wu oannaschda gugge, gell!
Mache die in Zores weje nix, also ählisch. Sou, jezad gugg isch mol uf de Vänneseid vobei, no zum Haushald 2007 konn isch noch nix finne.
Was hewwisch gelese, die hewwe e paar Millione mee Schdaian griggd, klasse, awwa warum kaafe se donn doch fa drei Millione orra waans zwaa, mä wäd ald un die Zeidung ist schunn in de griene Tonn, also schun Pulva, fa e paar Millione kaafe se ähn Krom doch uff die Hack.
In Haushald heen se, sache se. In Haushald. Also, wonn isch sou haushalde deed, moine Herrn.

Ufbasse sach isch blous, ufbasse! Also wonn isch grad sou um die Dreissisch wä, do deed isch die Nas mol hinna der WII orra de Blayschdeischen vorziehe un emol in die Zeidung gugge un longsom iwwalee, ob isch des ned alles emol bezahle meesd, deed isch. Un iwwalee, was ma do dun keend.

Ufbasse sach isch Eisch un ned vagesse: S’is Wahlkrompf! Keend ma die Leid, die wu geweeld wänn wolle jo mol denoch frooche, wä des alles emol bezahle soll un ob des noudwennisch is sou e Gragels zu mache, weje nix un uns manibulian wolle, un weismache was ma fa in geile Boschd wä. Älisch, do heed isch die Nas voll un deed des mol laud in die Weld kreische.

Wonn isch ma’s sou rischidisch iwwaleg, dä Koch dringd beschdimmd koan Ebblwoi, dä hoggd doch dauand im Rheingau ‘rum bei de Winza, was aa ned schleschd is sou in Riesling, awwa Ebblwoi dringda beschdimmd koana.

Ufbasse sach isch Eisch, uffbasse. S’is Wahlkrompf, gell!

Wie jezad, die Griene wolle aa geweeld wän. Ah jo, awwa die mache ned sou in Lebbdaach weje nix, weje Sache, die schun long gesse sinn. Wädda schun noch sehe, ufbasse, gell!