Alla Donn

Bei souere Hitz hewwisch ma schun ofd gewinscht, ma keend aa noch nie Haut ausziehe. Schnipp Schnapp, de Reissvaschluss runna, un schunn wäs kiehl. Under your skin is awwa glaawisch onnaschda gemond, orra?

Pälzer Gelawer #Palz

mä felld heid nix, awwera nix oi, iwwa was ma groine un piense keend. Was Neies mon isch hald.
Zum Groine isses!

babbld Vännemarisch wie isch aa. Ja unn? Vagesses, was es alles fa Daag gibt ah, noo.

Tag der Muttersprache..

Hewwe sie ah in Urlaub im Himml gebucht? Tonde Erika war schunn dort. Des hoddere gut gfalle, s'geeb sogar Jägerschitzl mit Pommfritz und Salad. Blous die Erzengl wään e bissl daab. Imma sou iwwazwersch und wollde alle finf Minudde was geisdisches vakinde. Schunschd wä awwa alles schee dusmo. Sogar de liewe Godd deed net beim Middagsschleefl schdään. S'wään awwa viel zu wenisch Männa do drowwe in Urlaub, von de Selische hot ma jo sou körberlisch nix, hot se gsaat und die Libbe nochgezooje. Ja und seitdem iwwaleggd sich de Couseng Erwin aa sou in Urlaub zu mache. Im Himml mime haufe Weiwa un ugschdärde Middagsschlof, des wä doch was. Fa Sie net aa? Alla, bis donn im Himml, awwa blous uf Urlaub, gell?

moin Senf
geit niemond ebbes oa
moin senf gebb isch nedd hä
in moin senf schdeggd net jada
soi werschdl

Iwwasetzt doch all die dumme Schbrisch vun de Werwe-tontes und de Bolidiga-ungls un vo allem de Topmanager-Godfathers in eian Dialegd, wonn schunschd nix mee hilft. No, gell, is geil, hä? Heeda ned gedengt. Do bleibd meischdens nix iwwarisch ausser däre haase Lufd und die is doch klasse bei dem Werra, orrra? Gell, alla donn.

Fa sou Ferz, wie die viele Farwe uf de Beem, sou ganz frieh schun im Johr, hewwe se Geld, awwa die Schtross mol wia oaschdennisch zu tään, do fehlts dann wia. Wonn die sisch uff e paa Farwe wennischa oanische keende, donn wä beschdimmd sogar noch e Schwesda mee fa de Kinnagaade drin. Nix va uuguud. Alla donn.

tötlisch? Isch moan jo blouß. Alle Leid, die isch sou kenn, in ledschda Zeit, wu gschdorwe sin un isch bei de Beädischung waa, waan Rendna. Ählisch, absolut jeda, pardong Hilde, jedi, ja, RentnarIN. Es schoind seldsoam zu soi. Oannan Leid schderwe wesendlisch seldena, wonn se net grad bei de Mafia schaffe orram Milidä. Isses unna denne Umständ iwwahaupt ärstrebenswert (was e Wort, ärsstrebenswert) Rendna zu wän? No, ISCH will koa RenterIN wänn, Hilde. S'geid um MISCH, vaschdeischde? Rende is tödlisch, des muss ma mol durschdenge. Ärlisch jezad. Wonn de mol Renda bischd isses sehr wahrschoinlisch, dass de irgendwonn abnibblschd, nedd, dass des vielleischd schleschd wää, s'kimmt imma druff ao, imma kimmts druff oa. Awwa unna denne Gsischtspunkte is die Rente ab sieweneseschzisch (67 ) gaar ned sou schlescht, orra? Do missese schun gugge, dass de net vornehä, äh den Exitus mescht, orra? Ach was is die Weld sou schleschd, orra ned? Ned? Is dursch, is gesse des Thema? Alla gud!

Moie grab isch ma e Loch in de Gaade, mach e Feierle drin un schitt wia Sond owwedriwwa. Donn loss sich des Loch voll mit dem Reie laafe. Un woann des Wassa donn sou rischdisch schee warm is, hubs isch naggisch noi un loss misch de gonze Daag vollreian. Des is scheena wie Sauna un billischa. Mä will jo schliesslisch aa was hu vun dem scheene Reie, gell? Alla donn.

Ja wer twittert denn da umhehr?

Guck ned dauand iwwa de Dellarond enaus. Ess und halt de Leffl bessa iwwa doin Della, schundschd valebbaschde noch alles. Beim Schnawwln guggd ma grad enunna un ned neewe naus. Des meschd ma beim Zeirungslese und beim Fernseh gugge, do guggschde awwa net neewe naus. Als grad weira und nedde mol im Ziggzagg denge, e bissl onnaschda un no, Du muschd ned alles bezahle, no Du bezahlschd ned alles, aa wonn das sou vokimmd. Gugg hald emol iwwa doin Dellarond enaus, awwa nedd baim schnawwln jetzad. Bauf leigd wia die Helfd neewedroa, Sagglzimend.

Die oane wolle ma weis mache isch solld in Schdatrad wehle, die onnan heede gän Schdimme fa de Boiemoaschda und wia oannan sin eigendlisch drei Baddeie, koana was des sou gonz genau, die selwa schoinbaa oam wennischde. Dodebei wädd doch blous die Stadtverordnetenversammlung geweeld. Isch gebs jo zu, dass des aa sou e Buzz-Word is, wu ma ned werglisch uf Vännemarisch sache konn, uhne zu grinse. Schdadvaodnedevasommlung. Bis ma des gsaad hod hewwe die Oannan driwwe mit ääne Gemoindräd schun lengschd de Kees gfresse. Un donn mache se all e Gedees weem Kummulian un Pannaschian. Isch waas, des sin aa sou Werra. Dodebei is des doch gonz oafach: „Haifln un Vadaale“. Also, isch wä haifln gehen. Zu vadaale gibds ned viel desmol. Wä jezad reed, was isch wehl, däf aa im Summa wia griene Sunneblumme oaagugge. Alla donn, gell?

Also, mä sin mit unsam arg zufriere, seid dä unsa Kondo abgrast hewwe ma werklisch koa Haischregge mee im Kiehlschrong, awwa aa schunschd nix meh. Oan Doud muss ma hald schderwe, gell? Awwa, wia sisch dursch de Kiehlschrong gebisse hot, unsan Kapitalischt, im schwarze Nodla mit Bissnessschuh sellene Schwaze Knaza, also gell, des war schun e Fraad. Es is doch aa sauegal, dass ma aa vonnehä schun koa Haischregge im Kiehlschrong 'katt hewwe. Sou in Kapitalischt im Haus is alle mol ebbes wäd, alla bis donn. De Kapitalischt riefd, was is des vo in Monn....

Mä solld denne junge Galtzkepplscha, wu sou gän wia Nazis wään, mol vorbabbln, wie des do geglunge hod, woann de Ortsgrubbefiehra uffm Balgon vun den Schillaschul de Friehschbord in de SA-Uniform gegrische hod, un wie schee des waa, wonn de Fähnleinfiehra in den Hidlajugend oam zum hunnadschde Mol hod schdähle wolle, in de Pidz dord newwam Kerwebladz. Mä solld denne Affe mol Schdiffl wichse losse, awwa was reij isch misch sou uff. S'deed longe mol de Uroba uffm Hochzischbild mit SS-Uniform zu zeige un wia des Haisl do de Jurre dem Schorsch vun de Badei abfuggad hod, va e paa Ebbl. Un vo allem sollde die Obas vazeile, wie se sisch gscheemd hewwe. E Weil long. Hewwe se ned? Aa doch, hoamlisch. Alla doann.

Die hewwe se doch net all....

Jo, kaaf da in Halleluja devor. Moin Gott.

Ach no, ned schun wia.
Sacht mikel zuma, sell longt.

Im allgemoine bin isch gänn bei mä sou innewennisch drin. Doch. Net imma, do keend isch misch als, äh wissd schun was. Awwa schundschd geits. Isch vareis gään, solong isch misch innewennisch midd nemme koann, bin awwa imma wia gään dehoam bei mä. Annaschda wu is aa schee, awwa do, wu isch jeden Schdoa kenn, do isses oam allscheendschde. Isch keent groine, wonn isch alls wia die ewische Zwiwwlgroina hä, wu ma vopinse, wie schee dasses oannschdawu wä, in Ameriga orra in Schina orra schunschtwu. Do deed sogaa de Epplwoi bessa schmegge. Ja, warum sinnsen donn net dord? Isch keend ma denge, dass se noch netemol in sisch selwa gään de Hoam sin und liewa bei onnan innenwenisch drin wään, wonn des geng. No ja, sou Leid musses aa gewwe hod moin Opa imma gsaad und noch in Abbl gscheild. Also, mä gfellsd eigentlisch gonz gud in mä drin. Äh bei Eisch aa? Alla donn.